السلام عليكم ورحمة الله
وبركاته
هذه قصيدة تعبر عن الهلال أحب أن اهديها لكل هلالي
زيك منو.. وانت الهلال
شبهك شنو.. يا احلى فال
كِملت روائع أشواقنا فيك.. واتلاشى في ريدك محال..
زيك منو..
في كل جيل انت الفريد
دائماً من الأنجم بعيد
إنت الوطن حبك مجيد
ريدتنا للأبيض هنا.. والله للأزرق شديد
زيك منو..
لي ريدك الأطفال تميل
ويسهر لريدك كل جميل
حُب الشباب اكبر دليل
أما الشيوخ تهواك أكيد.. والحكمة اماتنا القبيل..
زيك منو..
ما شفنا في الأكوان صفاك
ما عشنا في السودان بلاك
أزرق سماء وأبيض ملاك
إفريقيا والعالم مداك.. وشعارك النيلين كفاك
زيك منو..
أزرق أنيق..أبيض شقيق
جمهور عريق.. الكل صديق
لاعب بقدر الشعار.. وإداري برسم في الطريق..
زيك منو..
ما بتتغلب في ملعبك
ما بتتوصف ما فيك شك
اقوى الفرق هي بتعجبك
ازيك منو..
سيد النجوم.. صاحب فنون وإبداع دوام
في حضرتك تُخفى النجوم يا راقي يا سامي المقام
اللوعة ما في روعتك.. واللوحة ما في الانسجام
الروعة تغلب كل تيم.. وأنا فيك يغلبني الكلام
زيك منو..
يا هو الهلال اروع فريق في الكون عديل
الهامتو سامقة في كل جيل
القامتو زي طلع النخيل
الريد لغيرك ما بكون.. والدنيا غيرك مستحيل..
يا هو الهلال سيد الطرب
كاسات موشحة من ذهب
لا جات حظوظ لا جات وهب
هلالنا يا الاحباب صعب.. ما شفنا من ميدان هرب..
وهلالنا يا الأحباب صعب.. ما شاله زي زيكو وهرب
زيك منو..
كل البنات تتغنى بيك
كل البلاد تتمنى فيك
قدامنا تلعب ونشتهيك
ليه لأنك اغلى شي.. واجمل صفات الدنيا فيك..
زيك منو..
صلو الصعب بهوى الصعاب.. وكلمة محال هي بتطربك
مليون بقربك يفرحو
في 100 عندك بمرحو
مليار معاك بتسوحو
حتى الزعل خدعو النجم.. لسع غرامك بجرحو..
زيك منو..
انت الهلال قاهر الرجال ما بيكفي في حقك غُنا
ما بوفي في وصفك كلام.. كل اللغات بتقيف هنا
ريدتنا ليك زي روعتك.. زي ريدة الأم للجنا
غلبوك أو غالب أكيد.. بهواك في الحالتين أنا
زيك منو..
تملى المسامات بالفرح.. وعيونا بي ارقى الفنون
والروح تئن من غير تراك والدمعة تحرق في العيون
إحساسنا فات حد الهوس وعقولنا لامست الجنون
سبحانه من خلقك وطن.. وتعالى من خلاك سكون
زيك منو..
أسياده أخوان سيدا سيد البقول سيد البلد
زيك منو وانت الوحيد ماليك زول غير الله والوطن السعد
لا ليك مساند ولا نفاق جمهور نظيف ما تعدو عد
النصرو ما تحكيم وبيع.. والخصمو ما بديهو نقد
هلالنا يا روح الوطن.. يا ريدة ما بيخونه عهد
زيك منو...
الله والوطن والهلال..
اصدق قيم وأجمل مقال..
نهواك يا سيد النجوم نفداك يا نبع الوصال..
لو ما الهلال ما جاء الكفر وكان ما الهلال ما جو الرجال..
زيك منو..
